ویمن ٹی ٹوئنٹی ورلڈ کپ کی خواتین آفیشلز کا اعلان کردیا گیا

تفصیلات کے مطابق آئی سی سی نے ویمن ٹی ٹوئنٹی ورلڈ کپ کے لیے آفیشلز کا اعلان کردیا ہے جس میں تمام خواتین ہی شامل ہیں۔ 13رکنی پینل میں 3 ریفریز اور 10 امپائرز کو شامل کیا گیا ہے جس میں بھارت کی 3، سری لنکا، جنوبی افریقہ، آسٹریلیا، انگلینڈ کی دو، دو اور نیوزی لینڈ اور ویسٹ انڈیز کی ایک، ایک آفیشل شامل ہیں۔ میچ ریفریز میں بھارت کی جی ایس لکشمی، جنوبی افریقہ کی شاندرے فرٹز اور سری لنکا کی مچل پریرا شامل ہیں۔ امپائرز میں سوریڈفرن (انگلینڈ)، کلیئر پولوساک (آسٹریلیا)، ایلوئس شیریڈن (آسٹریلیا)، کم کاٹن (نیوزی لینڈ)، جیکولین ولیمز (ویسٹ انڈیز)، لاؤرین ایجن بگ (جنوبی افریقہ)، ورندا راٹھی (انڈیا)، انا ہیرس (انگلینڈ)، این جانانی (انڈیا)، نیمالی پریرا ( سری لنکا) شامل ہیں۔ویمن ٹی ٹوئنٹی ورلڈ کپ کا آٹھواں ایڈیشن 10 فروری سے جنوبی افریقہ میں شروع ہوگا، ٹورنامنٹ کا فائنل 26 فروری کو کھیلا جائے گا۔