اعظم سواتی کی درخواست ضمانت مسترد کردی گئی

ذرائع کے مطابق اعظم سواتی کے متنازع ٹویٹ کیس کی اسپیشل جج سینٹرل اسلام آباد نے سماعت کی۔ اسپیشل پراسیکیوٹر رضوان عباسی نے عدالت میں دلائل دیے جس میں انہوں نے ٹوئٹر پر اکاؤنٹ ویری فکیشن کا طریقہ کار بتایا۔ پراسیکیوٹر نے کہا کہ اعظم سواتی کے اکاؤنٹ پر بلیو ٹک ہے اور انہیں مشہور شخصیات نے فالو کیا ہوا ہے، جس میں مشہور سیاسی اور صحافتی شخصیات شامل ہیں جب کہ اعظم سواتی اپنے ٹوئٹر اکاؤنٹ سے کبھی انکاری بھی نہیں ہوئے۔سماعت کے دوران اعظم سواتی کی دائر درخواست کی پراسیکیوٹر رضوان عباسی نے مخالفت کی۔ اعظم سواتی کے وکیل سہیل خان سواتی نے حتمی دلائل دیتے ہوئے کہا کہ ٹوئٹس کے اسکرین شاٹس پر سائبر کرائم کا مقدمہ نہیں بنتا اور کیس اسی بنیاد پر بنایا گیا ہے۔ عدالت نے اپنے فیصلے میں کہا کہ اعظم سواتی نے ایک ہی جرم دوبار کیا لہٰذا ان کی درخواست ضمانت خارج کی جاتی ہے۔