اسموگ نے معمولات زندگی درہم برہم کردیے

ذرائع کے مطابق لاہور میں اسموگ کی وجہ سے لوگوں کے معمولات زندگی درہم برہم ہوگئے ہیں۔ اسموگ کے باعث سانس اور اس سے جڑے امراض میں اضافہ ہورہا ہے۔ اسموگ کے ان ہی مضر اثرات کے باعث ایک جانب جہاں حکومت نے اسکولوں میں ہفتے میں تین روز جمعہ، ہفتہ اور اتوار کی تعطیل کا اعلان کیا ہے وہیں لاہور کے نجی اداروں اور سب آفسز سے متعلق بھی اہم فیصلہ کیا گیا ہے۔اسموگ کے حوالے سے لاہور ہائیکوٹ کے بڑے حکم کے بعد حکومت کی جانب سے تمام نجی ادارے اور ان کے سب آفسز ہفتے میں دو روز جمعہ اور ہفتہ بند رکھنے کا اعلان کیا گیا ہے۔ صوبائی ڈیزاسٹر منیجمنٹ اتھارٹی کی جانب سے نوٹیفکیشن جاری کیا گیا ہے جس میں کہا گیا ہے کہ لاہور میں اسموگ کی وجہ سے لوگ متاثر ہو رہے ہیں۔ اس وجہ سے تمام نجی ادارے اور ان کے سب آفسز ہفتے میں دو روز جمعہ اور ہفتہ کے روز بند رہیں گے۔

ریلیف کمشنر پنجاب کے مطابق یہ نوٹیفکیشن آج سے 15 جنوری 2023 تک نافذ العمل رہے گا۔